BIDAIATEKA; AULKITIK ALTXATU GABE BIDAIATZEKO AUKERA

Uda urrun gelditzen zaigun arren, ez da oporretan pentsatzeko momentu txarra, izan ere, edozein une da aproposa bidai polit bat egiteko. Oporrak oso bestelakoak izan daitezke  antolatzen den bidaiaren arabera. Eskaintza zabala da eta erabakia zaila suerta daiteke. Horregatik, eta buruko minak arintzearren, Bidaiatekara hurbiltzea ez da batere ideia txarra. Bidaiateka Gazteen Argibideetarako Udal Bulegoko zerbitzu iraunkorra da, zeinean munduko  edozein tokitako informazio anitza aurki daitekeen. 2000. urtean ireki zituen bere ateak  oporraldian mugikortasuna bultzatzen duten baliabide eta jardueren berri, baita aholkuak ere emateko xedearekin. Animatzen?

Nora joan naiteke? 

Plaza berria, 1, heldu gara Bidaiatekara. Atea zabaldu eta eskuinetara biratzean liburutegi batean sartu garela ematen du. Dokumentazio anitza dago, baita esertzeko eta lasai lasai irakurtzeko mahai batzuk ere, 25 bat lagunentzako tokia gutxi gora behera.

Guztira, hirurehun eta laurogeita zazpi karpeta aurki daitezke. Karpetak tokien eta berariazko gaien arabera antolaturik daude. Herrialdeka antolatutako karpetak  koloreen bidez bereizten dira;  Afrika horia, Europa gorria, Asia morea eta arrosa, Ozeania laranja eta Amerika berdea. Bertan munduko edozein  herrialderi, eskualderi eta herriri buruzko informazioa dago bildua.  

Honez gain, karpeta monografikoak ere badaude. Euren azalen artean, Done Jakue, Zilarraren eta Cid-en ibilbideen inguruko informazioa,  baita kirol/abentura ekintzena, atzerriko hizkuntza ikastaroena edo udako ikastaroen gaineko dokumentazioa gordetzen dute.

Bidai liburuak, gidak eta “National Geographic”, “Viajeros” edo “Euskal Herria” bezalako bidai aldizkariak ere Bidaiatekako elementuak dira.

Badakit nora joan, eta orain?

Behin argi edukita nora joan nahi dugun, toki horren inguruko nahi beste xehetasun lor dezakegu. Liburuxkak, programazioak, turismo eta aisialdi eskaintza bereziak, garraiobideen ordutegiak,  nazioarteko aterpetxe-gidak... zerrenda luzea da. Gainera, deskontuak ahalbidetzen dituzten  karnetak (nazioarteko aterpetxe-kideen nazioarteko agiria eta ikasle, irakasle eta gazteen nazioarteko agiria) egiteko lekua ere bada Bidaiateka.

Gainera nahi izatekotan, kontsultak egiteko bi ordenagailu daude eta bertan turismoarekin zerikusia duten web orrialdeez osatutako aurkibidea dago.

Beharrezko informazioa bildu ostean bi aukera daude; etxera eraman edo fotokopiak atera. Etxera eramatekotan 48 horduko mailegua egiten dute Bidaiatekan eta fotokopiak nahiago badira hamar egin daitezke bertan doan.

Norentzat da bidaiateka?

Bidaiateka batik bat 18 eta 30 urte bitarteko gazteentzako zerbitzua da; halere, aisialdia, oporrak eta bidaiak antolatu ohi dituzten herritar guztientzat ere eskaintza erakargarria da. Bidaiatekako arduradunen arabera “motxileroak dira Bidaiatekaren bezero nagusiak, abentura maite duten pertsonak".

Bidaiariekin elkarrekintza sustatuz

Dagoeneko bidaia prest dugu, beraz, bidaiatzera!! Eta bueltan Bidaiatekarekin jar gaitezke berriz ere harremanetan, baina ez informazioa eskuratzeko baizik eta lehiaketa batean parte hartzeko. Izan ere, interneten topatuko dugun txoko ibiltariaren bitartez,  beste bidaiari batzuei laguntza emateko aukera dugu, leku interesgarriak gomendatuz,  argazkiak erakutsiz...  Gure esperientziak partekatzeagaitik zozketa batean sartuko gara, zeinean hainbat sari lor daitezkeen, besteak beste, liburuak, tren bidaiak edo argazki albumak. 

Gainera, hainbat jendek  oporretatik bueltan, bidaian eskuratutako gidak eta gainerako informazioa ekartzen du  zerbitzuaren berritze eta hobetze etengabea ahalbidetuz.

Zoriontasunaren formularik ez dago, baina bidaiatuz, gozatuz eta esperientziak partekatuz, zoriontsu izatea ez da zaila!

ORDUTEGIA:

Astelehenetik ostiralera, 10:00etatik 14:00etara eta 17:00etatik 19:00etara (ostiral arratsaldeetan itxita).

NON: Gazteen Argibideetarako Udal Bulegoan, Plaza berriko etxabeetan.